კეტოგენურ დიეტაში პრაქტიკულად განუყოფელი ნაწილია რომ ნებისმიერი პროდუქტის შეძენამდე გადაავლოთ თვალი ეტიკეტს და შემადგენლობას ზოგადად, ამიტომ მინდა ამ ვიდეოში გითხრათ ის რაღაცები, რაც უნდა იცოდეთ და რასაც უნდა მიაქციოთ ყურადღება პროდუქტის ყიდვის დროს.
რა თქმა უნდა, კეტო დიეტაზე ყველაზე მნიშვნელოვანია რომ პროდუქტს ქონდეს მინიმალურზე მინიმალური ოდენობით ნახშირწყლები და ასევე არ შეიცავდეს არაჯანსაღ ნივთიერებებს. ამიტომ უნდა გავეცნოთ როგორც შემადგენლობას ანუ საკვებ ღირებულებას, ასევე ინგრედიენტების სიას.
როგორც წესი კეტო მეგობრულ პროდუქტებს აქვს ხოლმე მაქსიმუმ 15 გრამი ნახშირწყალი, არის რაღაც გამონაკლისებიც და კონკრეტულ პროდუქტსაც გააჩნია, თუმცა უმეტეს შემთხვევაში საერთოდ არათუ 15 გრამი არამედ სულ რამდენიმე გრამი ნახშირწყალი აქვს ხოლმე კეტო მეგობრულ პროდუქტებს და რაც ცოტა კიდევ უკეთესი.
ისიც მნიშვნელოვანია ამ 15 გრამში შაქარი რამდენი გრამია, იმიტომ რომ შაქარი პრაქტიკულად ყველაზე არასასურველი ნახშირწყალია კეტოზე და დაშვებულია მაქსიმუმ რამდენიმე გრამი შაქარი 100 გრამ პროდუქტზე.
თუ პროდუქტში 30 ან 50 გრამი ან ზოგადად ბევრი ნახშირწყალია, ეს პროდუქტი ვერცერთ შემთხვევაში ვერ იქნება კეტო მეგობრული და შეგიძლიათ დახლზე დააბრუნოთ იქვე.
გარდა ზოგადი ნახშირწყლების ოდენობისა, იმასაც აქვს მნიშვნელობა რა წყაროდან მოდის ეს ნახშირწყლები და ასევე ბევრი დამალული, ყალბში შაქარი არსებობს, ამიტომ აქ უკვე გადავდივართ ინგრედიენტების სიაზე.
ინგრედიენტების ჩამონათვალში ინგრედიენტი რომელიც პირველი წერია ნიშნავს რომ ეს ინგრედიენტი ყველაზე დიდი ოდენობით არის პროდუქტში და ინგრედიენტი, რომელიც ბოლო წერია, შესაბამისად ყველაზე ცოტა ოდენობით.
ამიტომ მაგალითად თუ კითხულობთ პროდუქტის ინგრედიენტებს და პირველივე არის ვთქვათ შაქარი ან სოიოს ზეთი ან ნებისმიერი არაკეტომეგობრული პროდუქტი თუ ინგრედიენტი, ეს პროდუქტიც შეგიძლიათ დააბრუნოთ დახლზე იმიტომ რომ კეტოსთან საერთო არაფერი აქვს.
ზოგადად ბევრი არაკეტო ინგრედიენტი არსებობს მაგრამ აქვე ჩამოვთვალოთ ყველაზე გავრცელებული ინგრედიენტები. დავიწყოთ ყველანაირი შაქრით და ყალბი არაჯანსაღი შაქრებით, ესენია: გლუკოზა, ფრუქტოზა, მალტოდექსტრინი, დექსტროზა, დექსტრინი, სიმინდის ბოჭკო, მალთიტოლი ან მალთიტი, სუკრალოზა, საქარინი, ასპარტამი, ნებისმიერი ტიპის სახამებელი, ლაქტოზა და ა.შ.
ასევე ძალიან ხშირად არის შემადგენლობაში არაჯანსაღი ზეთები ანუ სოიოს ზეთი, პალმის ზეთი, მზესუმზირის ზეთი, ყურძნის წიპწის ზეთი, კანოლას ზეთი/რაფსის ზეთი და მოკლედ არაკეტომეგობრული ზეთები.
რა თქმა უნდა მე ახლა არ ჩამოვთვლი კიდევ ყველანაირ არაკეტომეგობრულ პროდუქტებს თუმცა თუ ასეთი ინგრედიენტი არის რაიმე პროდუქტის შემადგენლობაში, შესაბამისად გამოდის რომ არ არის კეტო.
მაგალითად შეიძლება ყიდულობთ თევზის კონსერვს და თუ თევზი არის საკუთარ წვენში, ეს დაშვებულია ჩვეულებრივ, მაგრამ თუ არის მზესუმზირის ზეთში, უკვე აღარ არის კეტო მეგობრული.
ზოგადად ინგრედიენტების სიას რომ დახედავთ, თუ რაღაც ქიმიური ნივთიერებების დიდი სია უწერია, თუნდაც ცოტა ნახშირწყალი ქონდეს, მაინც არ არის დიდად სასურველი პროდუქტი.
ასევე უნდა დააკვირდეთ საკვების რა ოდენობაზე დაყრდნობით არის მოცემული შემადგენლობა ანუ ცხიმები, ცილები და ნახშირწყლები. სტანდარტულად შემადგენლობა 100 გრამზე არის ხოლმე ნაჩვენები თუმცა ყოველთვის ასე არ არის.
მაგალითად შეიძლება იყიდოთ შოკოლადის ფილა, რომელიც არის ვთქვათ 100 გრამი და ამდროს შეიძლება იყოს ნაჩვენები შემადგენლობა 5 გრამში ანუ ერთ კუბიკში, რადგან მწარმოებელმა ვითომ გადაწყვიტა რომ ერთ კუბიკზე მეტს არ შეჭამთ დღეში, რაც რა თქმა უნდა არარეალურია.
თანაც საქმე რაშია, თუ სიტყვაზე 100 გრამ შოკოლადში არის 60 გრამი შაქარი ანუ 15 ჩაის კოვზი, 5 გრამიანი კუბიკის პორციაზე ეწერება მარტო 3 გრამი შაქარი ან ნახშირწყალი და თუ ყურადღებას არ მიაქციევთ პროდუქტის რა ოდენობაზეა ნაჩვენები ეს ყველაფერი, შეიძლება იფიქროთ რომ მთლიან შოკოლადის ფილაში 3 გრამი შაქარია, როცა სინამდვილეში 60 გრამია და ძალიან დიდი განსხვავებაა ამ ორს შორის.
ახლა ვისაუბროთ ცილებსა და ცხიმებზეც, აქ დიდად ბევრი დეტალი არ არის რაც უნდა იცოდეთ, მაგრამ რაღაც-რაღაც საკითხები არის მაინც.
როგორც იცით კეტოგენურ დიეტაზე ჩვენი სურვილია რომ საკვები შედგებოდეს ძირითადად ცილისა და ცხიმისგან, ამიტომ თუ რაღაც კონკრეტულ პროდუქტს ექნება დაახლოებით ერთი და იგივე ოდენობით ცილა და ცხიმი, იდეალური ვარიანტია.
თუ ცხიმი იქნება ბევრად მეტი, ესეც კეტოა ჩვეულებრივად, მაგალითად ნაღებში დაახლოებით 90% ცხიმია და ამიტომ მშვენიერი კეტო პროდუქტიც არის. თუნდაც შემადგენლობაში ცილა დომინირებდეს და ძალიან ცოტა ცხიმი იყოს, არც ეგ არის დიდი პრობლემა.
კარგი მაგალითია ხაჭო, რაც ძირითადად ცილაა თუმცა შეგიძლიათ ხაჭოსთან ერთად რაიმე სხვა ცხიმიანი პროდუქტი მიირთვათ და ამით დააბალანსოთ, შესაბამისად მთლიანად საკვებში გექნებათ როგორც ცილა ასევე ცხიმი და იქნება კეტოგენური.
ზოგადი პრინციპი არის მოკლედ რომ როცა დახედავთ პროდუქტის შემადგენლობას, ძირითადი ნაწილი ეკავოს ცილას და ცხიმს, ხოლო ნახშირწყლები იყოს მინიმალური ოდენობით და ბევრად ცოტა ვიდრე ან ცილა და ან ცხიმი.
აქვე ძალიან ხაზმასმით მინდა ვთქვა, რომ რაც არ უნდა ეწეროს პროდუქტის წინა მხარეს ეტიკეტზე, თუნდაც ეწეროს რომ კეტოა ან უშაქრო ან დიაბეტური ან ვთქვათ კეტო დამატკბობლით არის დატკბობილი, ყოველთვის წაიკითხეთ შემადგენლობა და ინგრედიენტები
იმიტომ რომ მწარმოებელს შეუძლია ძალიან ბევრი რამ დააწეროს გარედან და მარტივია ამ წარწერებით მანიპულირება, თუმცა თავისუფლად შეიძლება პროდუქტს ეწეროს უშაქრო და შეიცავდეს ვთქვათ 60 გრამ შაქარს.
მაგალითად მაღაზიებში იყიდება რამდენიმე სახის შოკოლადი რომელსაც აწერია რომ სტევიათია დატკბობილი, არადა გადმოატრიალებთ და ნახავთ რომ სტევია სულ 0.003%-ია შემადგენლობაში და მალთიტოლით არის დატკბობილი სინამდვილეში.
ან ყიდულობთ რაიმე დამატკბობელს, რომელიც წესით კეტო უნდა იყოს, მაგრამ გადმოატრიალებთ და ინგრედიენტებში უწერია მალტოდექსტრინი, ლაქტოზა ან ათასი საშინელება კიდევ. ამიტომ ყოველთვის წაიკითხეთ შემადგენლობა.
და მოკლედ პროდუქტის უკანა მხარეს პირველი აკვირდებით ნახშირწყლების ოდენობას და პროდუქტის რა წონაზეა ნაჩვენები ეს ნახშირწყლები, შემდეგ გადაავლებთ თვალს ინგრედიენტების სიას და თუ ყველა პირობა დააკმაყოფილა, შეგიძლიათ ეს პროდუქტი თავდაჯერებულად იყიდოთ.
მიუხედავად იმისა რომ ძალიან ბევრი ვილაპარაკე ამ საკმაოდ მარტივ საკითხზე, თუ დამწყები ხართ, არ დაგაბნიოთ ამ ამბავმა, სინამდვილეში ყველაფერი ბევრად იოლია, უბრალოდ ყველა დეტალს ჩავუღრმავდი და შეიძლება რთულად მოგეჩვენოთ ერთი შეხედვით.
თანაც იმ პროდუქტების უმეტესობა რაც კეტო მეგობრულია ისედაც ვიცით და ცნობილია, შეგიძლიათ ნახოთ ამ პროდუქტების სია ჩვენს საიტზე Ketogen.ge
თუ რაიმე პროდუქტზე გეპარებათ ეჭვი და არ იცით კეტო მეგობრულია თუ არა, შეგიძლიათ ჩვენს Facebook ჯგუფში დადოთ პროდუქტის წინა და უკანა მხარის სურათი და ჩვენი ჯგუფის წევრები გიპასუხებენ დაუზარებლად.
რა თქმა უნდა, ამ ჯგუფის ლინკს დავტოვებთ კომენტარებში და თუ ჯერ კიდევ არ ხართ წევრი, შეგიძლიათ შემოგვიერთდეთ. შევხვდებით შემდეგ ვიდეოში.
