ალბათ არცთუ ისე იშვიათად გინახავთ რომ ორი ადამიანი ერთი და იგივე დიეტაზე, ერთი და იგივენაირად იკვებება, მაგრამ ერთი იკლებს ვთქვათ 7 კილოს და მეორე 15-ს. დღევანდელ ვიდეოში ვისაუბრებთ ზუსტად იმაზე თუ რატომ ხდება ასე და ანუ რა ფაქტორებზეა დამოკიდებული წონის კლების სიჩქარე.
სანამ თვითონ ფაქტორებზე გადავალთ, ასეთი დაშვება გავაკეთოთ, რომ თქვენ ხართ სწორად შედგენილ დიეტაზე, როგორიც არის კეტოგენური დიეტა, თორემ სხვა შემთხვევაში კიდევ ბევრი რამ შეიძლება იყოს პრობლემა.
1. პირველი და ყველაზე მნიშვნელოვანი ფაქტორი, რაც გავლენას ახდენს წონის კლებაზე არის ჯანმრთელობა და რამდენად ჯანმრთელიც ხართ, იმდენად სწრაფად იკლებთ წონაშიც.
იმიტომ რომ წონის კლებაში ჩართულია ბევრი ორგანო და თუნდაც ერთი მათგანიც თუ არ მუშაობს ბოლომდე გამართულად, ამან უკვე სერიოზულად შეიძლება შეაფერხოს პროცესი, ეს არის ღვიძლი, ფარისებრი ჯირკვალი, კუჭი და ა.შ.
თქვენი მეტაბოლური ჯანმრთელობა როგორია ეს კიდევ ცალკე საკითხია. და თქვენ შეიძლება ფიქრობდეთ რომ სრულიად ჯანმრთელი ხართ, მაგრამ სინამდვილეში ადამიანების უმეტესობას აქვს მაგალითად გაცხიმოვნებული ღვიძლი, ინსულინის რეზისტენტულობა და ა.შ.
თქვენ შეიძლება არაფერს უჩიოდეთ ერთი შეხედვით, მაგრამ თუ ათეულობით წელი ბევრი ნახშირწყლებით და შაქრებით იკვებებოდით, რაღაც დონეზე თქვენი ჯანმრთელობა მაინც დაზიანებული იქნება.
2. ასევე ძალიან მნიშვნელოვანია წარსულში რამდენი და როგორი დიეტები გაქვთ ნაცადი. იმიტომ რომ სინამდვილეში დიეტების 99% არის გათვლილი მარტო კალორიების შეზღუდვაზე და ასეთი მიდგომა უბრალოდ ანელებს მეტაბოლიზმს.
ამიტომ ხშირად არის ხოლმე სიტუაცია, რომ ადამიანს რაც უფრო მეტი დიეტა აქვს ნაცადი, მით უფრო ნელა იკლებს წონაში.
3. მესამე ფაქტორი არის უკვე ასაკი და ეს მნიშვნელოვანია 2 მიზეზის გამო. ერთი არის ის, რომ რაც უფრო დიდი ხართ, პოტენციურად უფრო დიდი ხანი იკვებებით არაჯანსაღად რაც ჯანმრთელობაზე მოქმედებს და პოტენციურად უფრო მეტი დიეტაც გაქვთ ნაცადი.
და მეორე მიზეზი არის ის, რომ როცა ასაკი გემატებათ, ორგანიზმში ბევრი რამ იცვლება, მაგალითად მეტაბოლიზმი ნელდება ბუნებრივად, რაც ისევ და ისევ პირდაპირ მოქმედებს წონის კლების სიჩქარეზე.
4. მეოთხე ფაქტორი არის ის თუ როგორია თქვენი სტრესის დონე და რამდენად მოწესრიგებული ძილის რეჟიმი გაქვთ.
ეს ორი იმდენად მნიშვნელოვანია, რომ არათუ წონის კლების შენელებაზეა საუბარი, არამედ ცალკე აღებულმაც შეიძლება გამოიწვიოს პირიქით, წონის მატება და ბევრი სხვა პრობლემა.
როცა თქვენ დასტრესილი ხართ ან გამოუძინებელი, ეს ააქტიურებს სტრესის ჰორმონს კორტიზოლს, რაც გამოანთავისუფლებს დიდი ოდენობით შაქარს სისხლში და ჩვენ ვიცით რომ სისხლში მაღალი შაქრის დონე არის ის, რაც გვასუქებს ზუსტად.
ასეთ დროს ასევე ბევრად იმატებს შიმშილის შეგრძნება, ისევე როგორც შიმშილის ჰორმონი გრელინი და შესაბამისად დიდია შანსი რომ ბევრად მეტი ჭამოთ და თანაც ბევრი არაჯანსაღი საკვები.
5. მეხუთე და ერთ-ერთი ყველაზე მნიშვნელოვანი ფაქტორი შეიძლება იყოს ინსულინის რეზისტენტულობა. რაც გაკვრით ვახსენე უკვე, თუმცა ეს ისეთი საკითხია რომ ბევრად დიდ ყურადღებას იმსახურებს.
ჩვენ ვიცით, რომ ინსულინი არის დაგროვებითი ჰორმონი, რომელიც აგროვებს ცხიმს ორგანიზმში და აჩერებს წონის კლებას, ხოლო ინსულინის რეზისტენტულობა არის დაავადება, როცა ინსულინი მუდმივად მაღალია სისხლში.
მარტივად რომ ვთქვათ, ეს ნიშნავს რომ ბიოქიმიურ დონეზე ცხიმის წვის რეჟიმი უბრალოდ სულ გამორთულია და ალბათ ხვდებით ეს რამდენად ახდენს გავლენას წონის კლების დროს.
მაგალითად თუ თქვენ ვერ იკლებთ წონაში რაც არ უნდა გააკეთოთ ან რამდენიმე კილო დაიკელით და რაღაც წონაზე გაიჭედეთ თვეებია, ეს კლასიკური ინსულინის რეზისტენტულობის სიმპტომია.
ინსულინის რეზისტენტულობას იწვევს წლების განმავლობაში ბევრი ნახშირწყლების მიღება და იმის გამო რომ ადამიანების უმეტესობა ზუსტად ასე იკვებება, შესაბამისად ბევრ მათგანს აქვს განვითარებული გარკვეული დონის ინსულინის რეზისტენტულობა ისე რომ არც იციან.
კარგი ამბავი ის არის, რომ კეტოგენური კვებით შეიძლება ინსულინის რეზისტენტულობის მოშორება, თუმცა რა თქმა უნდა ამას საკმაოდ დრო ჭირდება.
და ზოგადად კეტოგენური დიეტა ნელ-ნელა აჯანსაღებს თქვენს ორგანიზმს, აჩქარებს მეტაბოლიზმსაც და ამიტომ უფრო და უფრო სწრაფად იკლებთ წონაში.
6. და რადგან კეტო დიეტაზე ვსაუბრობთ, უნდა ვთქვათ ბოლო ფაქტორი, რომ წონის კლების სიჩქარე დამოკიდებულია თქვენზე.
იმიტომ რომ კეტოგენურ დიეტას აქვს სულ რამდენიმე წესი და კვების გრაფიკს ადგენთ თქვენ, შესაბამისად შეგიძლიათ უფრო მეტად მოინდომოთ და ააჩქაროთ წონის კლება ან პირიქით.
საბოლოო ჯამში ეს არის ძირითადი ფაქტორები, რაც განსაზღვრავს იმას თუ რამდენად სწრაფად დაიკლებთ წონაში. დღეისათვის სულ ეს იყო და აქვე გახსოვდეთ, რომ რეალური ჯანმრთელობა მოდის მხოლოდ ბუნებრივად. შევხვდებით შემდეგ ვიდეოში.
