კეტოგენური კვება და კეტო დიეტა ზოგადად მე თუ მკითხავთ საკმაოდ მარტივია, თუმცა გაფუჭებული ტელეფონის პრინციპით ხშირად სოციალ ქსელებში ვრცელდება სხვადასხვა არასწორი ინფორმაცია, რაც ბევრ ადამიანს აბნევს, ყველაფერს ართულებს და მოკლედ დღეს ვისაუბრებთ 4 ყველაზე გავრცელებულ შეცდომაზე.
ესეიგი დავიწყოთ ცხიმზე საუბრით, სადაც ალბათ ყველაზე მეტი დაბნეულობა არსებობს და მაგალითად ბევრი ადამიანი ფიქრობს, რომ კეტოგენური კვება ნიშნავს ძალიან ბევრი ცხიმის მიღებას და საერთოდ კარაქში ბანაობას, რაც ახლოსაც არ არის სიმართლესთან.
კეტო დიეტა ნიშნავს იმას რომ ჩვენ ვამცირებთ რაციონში ნახშირწყლებს და ვიკვებებით ძირითადად ცილებითა და ცხიმებით. მეტიც, კეტო მეგობრული პროდუქტები ისედაც უმეტესად ცილას და ცხიმს შეიცავს, ამიტომ უბრალოდ უნდა აიღოთ სასურველი კეტო პროდუქტები და იკვებოთ ძირითადად დღეში ორჯერ. სულ ეგ არის მთელი კეტოგენური კვების არსი. ამის იქით რაიმეს განსჯა და თავის მტვრევა წყლის ნაყვაა მხოლოდ.
კეტოგენური კვება არ არის ბევრი ცხიმების დიეტა და თუ ვინმე გეტყვით, რომ კეტო დიეტაზე რაც მეტ ცხიმს მიიღებ, უკეთესია ან ცხიმებით გამოტენვაა საჭიროა ან რაიმე მსგავსი, შეგიძლიათ ეს ვიდეო გაუგზავნოთ. მით უმეტეს წონის კლების დროს როცა ადამიანს წონა გაუჩერდება, რაც სრულიად ჩვეულებრივი ამბავია, ამ დროს ხშირად მინახავს რომ ურჩევენ ცხიმის მომატებას და უფრო მეტი ცხიმის მიღებას, რაც საერთოდ აფსურდია და ყველანაირი კანონზომიერების დარღვევა ამ სამყაროში, დაწყებული თერმოდინამიკის კანონებით და დასრულებული უბრალოდ საღი აზრით.
რეალურად პირიქით, თუ რამდენიმე კვირით გაგიჩერდათ წონა, N1 რამ რაც უნდა ცადოთ არის ცხიმის შემცირება, იმიტომ რომ თუ თქვენ იმდენ ცხიმს მიიღებთ საკვებიდან, რაც ორგანიზმს ენერგიის საწარმოებლად ჭირდება, შესაბამისად არანაირი საჭიროება არ იქნება რომ ორგანიზმში დაგროვილი ცხიმი დაიწვას და წონის კლებაც გაგიჩერდებათ, ამიტომ ასეთ დროს ცხიმის ოდენობა უნდა შეამციროთ არათუ გაზარდოთ.
ბევრ ადამიანს რატომღაც ექმნება ისეთი შთაბეჭდილება რომ თითქოს კეტო დიეტაზე რაც უფრო მეტ ცხიმს შეჭამს, ეს უფრო დააკლებინებს წონაში, რაც ისევ და ისევ ახლოსაც არ არის რეალობასთან.
ცხიმი რა თქმა უნდა საჭიროა ჯანმრთელობისთვის, საჭიროა დასანაყრებლად და ა.შ. და ა.შ., ამიტომ უნდა მიიღოთ ჯანსაღი ცხიმი რითიც სავსეა კეტო დიეტა, ამაზე არაერთი ვიდეო მაქვს, თუმცა ეს არ ნიშნავს რომ რაც მეტი, მით უკეთესი. უნდა მიიღოთ იმდენი ცხიმი რომ დანაყრდეთ და უნდა შეამციროთ ცხიმის ოდენობა თუ წონის კლება გაჩერდა.
ახლა რაც შეეხება ნახშირწყლებს და შაქრებს, ამ მიმართულებითაც არსებობს გარკვეული დაბნეულობა. რაც ჩვენ კარგად უნდა გავიაზროთ არის ის რომ კეტოგენურ დიეტაზე ჩვენ ვამცირებს ნახშირწყლებს და შაქრებს, ვამცირებთ, თუმცა არ ვიღებთ მთლიანად. ერთი რომ საჭიროება არ არსებობს სრულად ამოღების და მეორე რომ პრაქტიკულად შეუძლებელია ნახშირწყლების და შაქრების ამოღება მთლიანად, იქიდან გამომდინარე რომ ერთადერთი პროდუქტი, რომელიც ნახშირწყლებს არ შეიცავს არის ხორცი და აქაც კი არის პატარ-პატარა გამონაკლისები.
კეტო დიეტაზე ნახშირწყლებს ვამცირებთ საშუალოდ 20 გრამამდე ან 50 გრამამდე იქიდან გამომდინარე თუ რა არის ჩვენი მიზანი და ამაში შედის შაქრებიც, რაც ნახშირწყალია, რა თქმა უნდა. მაგალითად ზოგი ადამიანი ფიქრობს რომ კეტო დიეტაზე 1 გრამ შაქარს არ იღებს, რაც ასევე არასწორია, იმიტომ რომ ყველა პროდუქტი ასე თუ ისე შეიცავს შაქარს.
რა თქმა უნდა, კეტო მეგობრული პროდუქტები ბევრად უფრო ნაკლებ შაქარს შეიცავს და კეტო კვების მთელი აზრიც ეგ არის, მაგრამ იმის თქმა მინდა რომ რამდენიმე გრამი შაქარი და ნახშირწყალი პრობლემა არ არის და არც ჯანმრთელობას ავნებს და არც წონას. რა თქმა უნდა ეს მაშინ როცა ამ ცოტა ნახშირწყლებს და შაქრებს იღებთ კეტო მეგობრული, ბუნებრივი და ნატურალური პროდუქტებიდან. ამიტომ ეს ყველაფერი კარგად გავათვიცნობიეროთ და ცოტა მოვეშვათ.
მაგალითად როგორც იცით, ჩვენს მაღაზიაში იყიდება სხვადასხვა კეტო პროდუქტები და ყოფილა შემთხვევა რომ მაღაზიაში მოდის ადამიანი, დახედავს ვთქვათ ნუშის პასტას და გვეუბნება რომ „აბა როგორ არის ეს კეტო პროდუქტი, როცა 4 გრამ შაქარს შეიცავს“, როცა შეიძლება წინა დღეს იგივე ადამიანმა ჭამა ნუში რომელიც ასევე 4 გრამ შაქარს შეიცავდა, უბრალოდ როგორც ვთქვი ბევრმა ადამიანმა არ იცის რომ კეტო მეგობრულ პროდუქტებშიც არის მცირე ოდენობით შაქარი.
თორემ ნუშის პასტა რა თქმა უნდა ნუშისგან არის გაკეთებული და თუ ნუში შეიცავს ცოტა შაქარს, ნუშის პასტაშიც იქნება შაქარი. მოკლედ კეტო დიეტაზე ვამცირებთ შაქარს და ნახშირწყლებს, თუმცა მცირე ოდენობით ყველაფერშია და ეს პრობლემას არ წარმოადგენს.
ასევე კიდევ ერთი საკითხი ნახშირწყლების მიმართულებით არის კეტო დამატკბობლები ანუ ერითრიტოლი და ქსილიტოლი. მოკლედ ეს დამატკბობლები ტექნიკურ დონეზე ნახშირწყლებია და ზოგ შემთხვევაში პროდუქტის ეტიკეტზე შეიძლება იყოს მითითებული როგორც ნახშირწყლები, თუმცა შეიძლება არ იცოდეთ, რომ ამ 2 დამაკბობლის ნახშირწყლებს არანაირი მნიშვნელობა არ აქვს და ყურადღებას არ ვაქცევთ.
მიზეზი ისაა რომ ტექნიკურად ზოგ შემთხვევაში შეიძლება ნახშირწყლების კატეგორიაში გადის ეს 2 დამატკბობელი, მაგრამ ორგანიზმი ვერ ითვისებს, სისხლში შაქრის დონეზე გავლენა არ აქვთ, შეუცვლელად გამოიდევნება ორგანიზმიდან და ამიტომ არ გვაღელვებს მათი არსებობა პროდუქტში ისე როგორც გვაღელვებს ვთქვათ სახამებლის ან სხვა ნახშირწყლის არსებობა. მაგალითად იგივე პრინციპით არ ვაქცევთ ყურადღებას საკვებ ბოჭკოებს იგივე უჯრედისს, რაც არის ბოსტნეულში და თხილეულში, იმიტომ რომ ასევე არ აქვს გავლენა სისხლში შაქრის დონეზე.
მოკლედ კეტოგენურ დიეტაზე ვამცირებთ მხოლოდ იმ ნახშირწყლებს, რომლებიც ზრდიან სისხლში შაქრის დონეს და თუ ეტიკეტზე ერითრიტოლი ან ქსილიტოლი იქნება მოცემული ნახშირწყლების სახით, ეწერება როგორც პოლიოლები და მიხვდებით რომ ან ერითრიტოლია აღნიშნული ან ქსილიტოლი და შეგიძლიათ ეს ოდენობა თავისუფლად გამოაკლოთ მთლიანი ნახშირწყლების ოდენობას.
სხვათაშორის რამდენიმე სხვა დამატკბობელიც შეიძლება იყოს აღნიშნული როგორც პოლიოლი, ამიტომ რა თქმა უნდა, ისიც უნდა იცოდეთ რომელი შაქრის შემცვლელია გამოყენებული კონკრეტულ პროდუქტში, უნდა წაიკითხოთ ინგრედიენტების სია რომ გაიგოთ არის თუ არა საერთოდ კეტო მეგობრული.
ბონუსად იმასაც გეტყვით რომ უკვე ძალიან ბევრი პროდუქტი გამოჩნდა საქართველოში, რომელსაც ხან კეტოს ეძახიან და ხან უშაქროს, თუმცა ხშირ შემთხვევაში ეს საერთოდ არ შეესაბამება რეალობას და აუცილებელია წაიკითხოთ პროდუქტის შემადგენლობა და ინგრედიენტები, ამაზე ცალკე ვიდეოც გვაქვს. თორემ თუ უბრალოდ იმიტომ იყიდით პროდუქტს რომ კეტო მეგობრული აწერია ან უშაქრო, საბოლოოდ აღმოჩნდებით მოტყუებული, უნდა წაიკითხოთ შემადგენლობა.
ახლა გადავიდეთ მესამე შეცდომაზე და უნდა ვისაუბროთ მარილზე. ყველა ვიდეოში სადაც ვსაუბრობთ კეტოგენურ კვებაზე, ვცდილობ ხაზი გავუსვა მარილის მნიშვნელობას, თუმცა როგორც პრაქტიკამ გვაჩვენა ზოგი ადამიანი რატომღაც მაინც და მაინც ამ წესს არ ითვალისწინებს ხანდახან. მარილი რა თქმა უნდა ყოველთვის საჭირო და აუცილებელია, ამაზე ვიდეოც მაქვს, მაგრამ კეტო დიეტაზე ცოტა უფრო მნიშვნელოვანიც არის რომ მიიღოთ საკმარისი მარილი, რაც არის საშუალოდ 2 ჩაის კოვზი დღეში.
მოკლედ საქმე რაშია, ჩვეულებრივ შემთხვევაში როცა თქვენ იღებთ ბევრ ნახშირწყლებს, რაც არის ცომეული, ტკბილეული, ბურღულეული და ა.შ., ეს ნახშირწყლები ორგანიზმში აკავებს წყალს და წყალთან ერთად აკავებს მარილსაც. ნუ ამის გამო თქვენ ერთი მხრივ ცოტა უფრო ნაკლები მარილი გჭირდებათ, მაგრამ მეორე მხრივ ხშირად ეს იწვევს შეშუპებას, მაღალ წნევას და ა.შ.
მაგრამ კეტოგენურ დიეტაზე იქიდან გამომდინარე რომ ნახშირწყლებს მინიმუმამდე ვამცირებთ, ზედმეტი სითხის შეკავება ორგანიზმში აღარ ხდება, შესაბამისად ეს აჩენს საჭიროებას რომ უფრო მეტი მარილი მიიღოთ, რაც თავისმხრივ პასუხისმგებელია ორგანიზმში სითხისა და მინერალების ბალანსზე.
ანუ თქვენ რომ არ მიიღოთ საკმარისი მარილი კეტოგენურ კვებაზე, როგორც ეს წესია, თქვენი ორგანიზმი დაკარგავს უფრო მეტ მინერალს, რის შედეგადაც შეიძლება გქონდეთ დაბალი წნევა ან შეიძლება თავს ცოტა სუსტად და მოთენთილად გრძნობდეთ და ა.შ., იმიტომ რომ თუ საკმარის მარილს არ მიიღებთ, უფრო მეტად დაკარგავთ კალიუმსა და მაგნიუმს, რაც ამ ყველაფერზეა პასუხისმგებელი.
ალბათ ათასჯერ ყოფილა ესეთი შემთხვევა რომ ადამიანმა დაიწყო კეტო დიეტა და მეუბნება რომ ცოტა სუსტად გრძნობს თავს, მე შესაბამისად ვახსენებ ხოლმე რომ მარილია საჭირო და პრობლემა 99%-ში გვარდება მაშინვე.
ან შეიძლება დაიწყოთ კეტოგენური კვება, არ გაითვალისწინოთ მარილის წესი და რამდენიმე თვეში შეიძლება გახშირდეს თმის ცვენა. თმის ცვენა ხანდახან წონის კლებას ახლავს თან როგორც არ უნდა იკვებებოდეთ, თუმცა მათ შორის მიზეზი შეიძლება იყოს ის რომ საკმარის მარილს არ იღებთ, რის შედეგადაც ორგანიზმმა დაკარგა გარკვეული ოდენობით მინერალი თუთია, რაც პასუხისმგებელია თმის ზრდაზე.
მოკლედ მიიღეთ მარილი და ნუ გაირთულებთ ცხოვრებას. ან თუ მარილს არ მიიღებთ საკმარისად, დალიეთ მაგნიუმის, კალიუმის და თუთიის საკვები დანამატები, სტატისტიკურად ადამიანების უმეტესობას მაინც აკლია ეს მინერალები და ისედაც ნებისმიერ სიტუაციაში წაგადგებათ მხოლოდ.
ხოლო მეოთხე და ბოლო შეცდომა, რასაც მთლად იმდენად ბევრი ადამიანი არ უშვებს როგორც წინა სამის შემთხვევაში, თუმცა მოკლედ ეს შეცდომა არის უბრალოდ რაღაცების თვლა კეტო დიეტაზე. კეტოგენური კვების ერთ-ერთი მთავარი დადებითი მხარე ისაა რომ არაფრის თვლა, ზომვა და აწონვა არაა საჭირო, მათ შორის ამიტომაც არის ყველაზე პოპულარული კვების სტილი მსოფლიოში, სხვა ბევრ სიკეთესთან ერთად, თუმცა თუნდაც ეს ყველაფერი გვერდით გადავდოთ და უბრალოდ რომ დავფიქრდეთ, რატომ ითვლით რაღაცებს? ან რას ითვლით? ან რისთვის? რა შედეგს ელოდებით რაღაცების თვლისგან?
ვთქვათ რაღაც ონლაინ კალკულატორმა ან აპლიკაციამ დაგიწერათ რომ დღეში 100 გრამი ცხიმი უნდა მიიღოთ. თქვენი აზრით რაზე დაყრდნობით გიწერთ ამას აპლიკაცია? რატომ შეიძლება გჭირდებოდეთ 100 გრამი ცხიმი და არა ვთქვათ 90 ან 80. სადმე ხელზე გაწერიათ რამდენი ცხიმი უნდა მიიღოთ დღეში თუ საიდან მოიტანა აპლიკაციამ ეს რიცხვი? იმიტომ რომ რეალურად არანაირი მეცნიერული კალკულაცია არ არსებობს, რაც გვეტყოდა რამდენი ცხიმი გვჭირდება დღეში.
ან ვთქვათ მიყევით ინსტრუქციას, ყოველდღე მიიღეთ ეს 100 გრამი ცხიმი და წონის კლება გაჩერდა, აღარ იძვრის. რას აკეთებთ ამ შემთხვევაში? წესით უნდა შეამციროთ ცხიმის ოდენობა რაციონში, გუშინ რომ დალიეთ ორი ჭიქა ნაღებიანი ყავა, დღეს დალევთ ერთს ხომ? მაგრამ აპლიკაციამ ხომ დაგიწერათ რომ რატომღაც 100 გრამი ცხიმი უნდა მიგეღოთ დღეში. გააგრძელებთ ამდენი ცხიმის მიღებას, წონაში ვეღარ დაიკლებთ, შეამცირებთ ცხიმს და დაიკლებთ, მაგრამ გამოვა რომ აპლიკაციას არ დაემორჩილეთ.
ჰოდა მაგ ყველაფრის კეთება ხომ აპლიკაციის გარეშეც შეგიძლიათ, როცა გაჩერდება წონა რამდენიმე კვირით, შემაცირეთ ცხიმის ოდენობა. თავს რატომ იტკიებთ და რაღაც გამოუსადეგარ ბუღალტერიას რატომ აწარმოებთ?
ერთადერთი რის თვალის დევნებასაც შეიძლება ქონდეს აზრი ეგ არის კალორიები და ისიც იმ შემთხვევაში თუ ბოლო რამდენიმე კილო გაქვთ დასაკლები. იქიდან გამომდინარე რომ ბოლო რამდენიმე კილოს დაკლება ყველაზე რთულია და მაგ დროს მაქსიმალური ძალისხმევაა საჭირო. თუმცა სხვათაშორის ამ სამყაროში არ არსებობს არცერთი ხელსაწყო და ტექნიკური გადაწყვეტა, რაც ზუსტად ზომავს ადამიანი რამდენ კალორიას წვავს დღეში, ვგულისხმობ მაღალტექნოლოგიური ლაბორატორიის პირობებშიც კი და მით უმეტეს რაღაც აპლიკაცია თქვენს ტელეფონში ხომ საერთოდ ვერ განსაზღვრავს ამ ამბავს .
ამაზე ერთი გენიალური გამოთქმა მახსენდება ხოლმე, რომ „კაცი ბჭობდა, ღმერთი იცინოდაო“, იმიტომ რომ თქვენ რაღაცებს ითვლით, პრაქტიკულად თამაშობთ რაღაც გამოგონილ წესებზე დაყრდნობით და რეალურად თქვენი ორგანიზმისთვის საერთოდ არაფერს ცვლის დაითვლიდით რაიმეს თუ არა.
თქვენს ორგანიზმზე უკეთესად არცერთმა აპლიკაციამ და კალკულატორმა არ იცის რამდენი ცილა და ცხიმია საჭირო, უნდა ჭამოთ იმდენი რამდენსაც მოგთხოვთ ორგანიზმი და მიიღებთ იმდენ ცილას და ცხიმს, რამდენიც გჭირდებათ, ეს არის კეტოგენური კვება.
თუ წონის კლების დროს ცოტა შეფერხდებით, მოაკლებთ ცხიმს და გაგრძელდება წონის კლება. ამ ყველაფერს აპლიკაციის და ბუღალტერიის გარეშეც თავისუფლად გააკეთებთ და დამიჯერეთ ნერვებიც უკეთეს მდგომარეობაში გექნებათ. კომენტარებში დაწერეთ თქვენი აზრით რომელია კეტო დიეტის ის შეცდომა რაც არ მიხსენებია, დღეისათვის კი სულ ეს იყო, შევხვდებით შემდეგ ვიდეოში.
