დალიეთ 1 ჭიქა ღვინო დღეში და იქნებით ჯანმრთელები, არ შეგაწუხებთ არანაირი დაავადება და იცოცხლებთ დიდხანს.
ალბათ ჩემსავით თქვენც ხშირად გაგიგიათ მსგავსი ფრაზები და კარგადაც ჟღერს, თუმცა მოდით დეტალურად განვიხილოთ რას შეიცავს ღვინო და არის თუ არა მართლა ასე ძალიან სასარგებლო ყოველდღიურად დალევა.
მოდით ჯერ ჩამოვთვალოთ რა სასარგებლო თვისებები აქვს ღვინოს, შემდეგ ვთქვათ რა უარყოფითი ეფექტები აქვს და ერთად შეგვიძლია გამოვიტანოთ დასკვნები, ღირს თუ არა ღვინის ხშირად დალევა.
- პირველი სასარგებლო თვისება არის, ის რომ ღვინო შეიცავს პოლიფენოლებს, რაც არის ანტიოქსიდანტები და ანტიოქსიდანტები ამცირებენ ანთებით პროცესებს ჩვენს ორგანიზმში. ხოლო თვითონ ქრონიკული ანთებითი პროცესების შედეგი შეიძლება იყოს უკვე ყველაფერი დაწყებული აკნედან, დასრულებული კიბოთი.გამოდის რომ ღვინოში არსებული ანტიოქსიდანტები ამცირებენ სხვადასხვა დაავადებების რისკებს ორგანიზმში, თუმცა ვერ ვიტყვით რომ ეს ანტიოქსიდანტები მაინც და მაინც დიდი ოდენობით არის ღვინოში.
- მეორე სასარგებლო თვისება არის განწყობის გაუმჯობესება და განტვირთვა. ღვინო ასტიმულირებს ტვინში ნეუროტრანსმიტერების გამოყოფას, როგორიც არის სერატონინი, დოპამინი და ა.შ. ეს ნეუროტრანსმიტერები იწვევენ რეალურად უკვე იმ განწყობის გაუმჯობესებისა და გარკვეული სიმშვიდის ეფექტს რასაც ვიღებთ ღვინისგან.
- ღვინო ასევე ამცირებს გულის დაავადებების რისკებს, რადგან ორგანიზმში ზრდის „კარგი“ HDL ქოლესტერინის ოდენობას, რაც გიცავთ სხვა ტიპის ქოლესტერინებისგან გამოწვეული ზიანისგან.ეს ერთი მხრივ გამოწვეულია უკვე ნახსენები ანტიოქსიდანტების მიერ და მეორე მხრივ ძმარმჟავის მიერ, რომელიც მიიღება ალკოჰოლის მეტაბოლიზებით. როცა თქვენ იღებთ ალკოჰოლს, თქვენი ღვიძლი მას გარდაქმნის ჯერ აცეტალდეჰიდად და შემდეგ აცეტალდეჰიდს გარდაქმნის ძმარმჟავად.ამიტომ უკვე HDL ქოლესტერინის ზრდასა და გულის ჯანმრთელობის გაუმჯობესებაზე გავლენას ახდენს უკვე ანტიოქსიდანტებიც და ძმარმჟავაც ერთად.
- თვითონ ღვინოს აქვს კიდევ სხვადასხვა სასარგებლო თვისებები, რაც ძირითადად გამოწვეულია ისევ ძმარმჟავის მიერ. ძმარმჟავა ამცირებს სისხლში შაქრის დონეს, რაც ზოგადადაც ძალიან სასარგებლო შეიძლება იყოს თქვენთვის და კიდევ უფრო კარგი თუ დიეტაზე ხართ და წონის დაკლება გინდათ.სისხლში მუდმივად მაღალი შაქრის დონე იწვევს მეორე ტიპის დიაბეტს, მხედველობის და აზროვნების გაუარესებას, ასტიმულირებს ანთებით პროცესებს, ისევ და ისევ ზრდის გულის დაავადებების რისკებს და ა.შ.
- ძმარმჟავა ასევე გეხმარებათ მინერალების შეთვისებაში, რადგან კუჭში გარკვეული დროით ზრდის მჟავიანობის დონეს, რაც აუმჯობესებს თქვენს საჭმის მომნელებელ სისტემას და ეს უკვე ქმნის გარემოს რომ საკვებიდან შეითვისოთ უფრო მეტი მინერალი.
ეს არის ძირითადად ღვინის სასარგებლო თვისებები და ახლა გადავიდეთ უარყოფით ეფექტებზე, რაც არცთუ ისე ცოტაა და სამწუხაროდ წინასწარ შეგვიძლია ვთქვათ, რომ გააბათილებს ზოგ დადებით თვისებას, რომლებიც ახლა ჩამოვთვალე.
- პირველი რაც შეგვიძლია ვთქვათ, არის ის, რომ ალკოჰოლი ანუ ეთანოლი ორგანიზმისთვის არის ჩვეულებრივი ტოქსინი ანუ საწამლავი და ამიტომ ორგანიზმში იწვევს ძალიან დიდი ოდენობით ანთებით პროცესებს, რაც როგორც უკვე ვახსენე არის გამომწვევი პრაქტიკულად ყველაფერი ცუდის დაწყებული ტკივილიდან, დასრულებული კიბოთი.და მიუხედავად იმისა რომ ღვინო შეიცავს გარკვეული ოდენობით ანტიოქსიდანტებს, რაც ზუსტად ანთებითი პროცესების საწინააღმდეგოდ არის მიმართული. თვითონ ალქოლოჰის მიერ გამოწვეული ანთებითი პროცესების მასშტაბი იმდენად დიდია, რომ ანტიოქსიდანტების არსებობა პრაქტიკულად აზრს კარგავს.ამ ანტიოქსიდანტებს ისიც არ შეუძლიათ რომ ღვინის მიერ გამოწვეული ზარალი გაანეიტრალონ და საუბარიც აღარ არის უკვე ორგანიზმისთვის დამატებითი სარგებლის მოტანაზე.
- ასევე რადგან ალკოჰოლი არის საწამლავი, მისი დეტოქსიკაცია და უვნებელ ნივთიერებად გარდაქმნა არის ღვიძლის მოვალეობა, თუმცა როცა თქვენ ღვინოს ხშირად სვამთ, მით უმეტეს ყოველდღე, ხდება ღვიძლის გადატვირთვა, პირველ ეტაპზე ღვიძლის გაცხიმოვნება, რაც არის დაავადება, შემდეგ გემართებათ ალკოჰოლური ჰეპატიტი და საბოლოოდ ციროზი, რაც არის ღვიძლის დაშლა და იწვევს სიკვდილს.
- ღვინოს აქვს საკმაოდ უარყოფითი ეფექტი თქვენს წონაზე. ერთი მხრივ ისევ ღვიძლის გამო, რადგან ღვიძლია თავად ის ორგანო, რომელიც წვავს ცხიმებს და მეორე მხრივ იმიტომ, რომ შეიცავს საკმაო ოდენობის ნახშირწყლებს. ხოლო ნახშირწყლები იწვევენ ორგანიზმში დიდი ოდენობით ინსულინის გამოყოფას, რაც ამ ნახშირწყლებს გარდაქმნის ცხიმებად და აგროვებს ორგანიზმში.ანუ გამოდის რომ ერთი მხრივ ღვინო თვითონ იწვევს ცხიმის დაგროვებას და წონის მატებას და მეორე მხრივ აჩერებს ცხიმის წვას და წონის კლებას.
- როგორც ვახსენე, ალკოჰოლს აქვს გარკვეული განტვირთვის და მოდუნების ეფექტი, თუმცა უპირველესყოვლისა იმ ნეუროტრანსმიტერების სტიმულირება, რომლებსაც მივყავართ ამ განტვირთვის ეფექტამდე, იწვევენ შეჩვევასდა ასევე რაც უფრო დიდი ხნის განმავლობაში მოიხმართ ალკოჰოლს, უფრო ნაკლები მომადუნებელი ეფექტი აქვს ამ ნეუროტრანსმიტერების გამოყოფას. შესაბამისად გჭირდებათ რომ დალიოთ მეტი ალკოჰოლი, რომ მიიღოთ თუნდაც იგივე ეფექტი.
- ღვინო კიდევ იწვევს ძილის პრობლემებს. ეს შეიძლება ცოტა უცნაურად ჟღერდეს იმ ადამიანებისთვის, ვინც ფიქრობს რომ ღვინო ძილში ეხმარებათ, მაგრამ რეალურად ალკოჰოლი არ გაძლევთ საშუალებას რო გადახვიდეთ ე.წ. „ღრმა ძილის“ რეჟიმში და ყველანაირი აღმდგენითი პროცესები, რისთვისაც ჩვენ გვძინავს რეალურად, ხდება ძილის ამ ფაზაში.შეიძლება ითქვას, რომ პრაქტიკულად არ გძინავთ და ვერ იღებთ ძილის იმ ხარისხს რაც საჭიროა. ასევე შეიძლება ღამის განმავლობაში გაგეღვიძოთ რამდენჯერმე, რაც კიდევ უფრო ართულებს სიტუაციას, მიუხედავად იმისა, რომ შეიძლება არც გახსოვდეთ ეს ფაქტი.
ამ ყველა ფაქტზე დაყრდნობით შეიძლება ითქვას, რომ ღვინის უარყოფითი ეფექტი ბევრად უფრო დიდია, ვიდრე სარგებელი. თანაც როგორც ვხედავთ, იმ ჩვენი ჩამოთვლილი სასარგებლო თვისებებიდან პირველი 2 პრაქტიკულად ბათილდება და დანარჩენი 3 გამოწვეულია ძმარმჟავის მიერ და კონკრეტულად ღვინოსთან კავშირი დიდად არ აქვს.
და რეალურად ძმარმჟავის ბევრად უკეთესი წყარო არის მაგალითად ვაშლის ძმარი, რომელსაც არ აქვს არც ეს და არც სხვა უარყოფითი ეფექტები და პირიქით, კიდევ უფრო მეტი სასარგებლო თვისება აქვს. ამიტომ თუ ჯანმრთელობის გაუმჯობესება გინდათ, ჯობს დალიოთ ვაშლის ძმარი და არა ღვინო.
საბოლოოდ რა შეგვიძლია ვთქვათ, თუ თქვენ თვლიდით რომ ღვინო სასარგებლო სასმელი იყო, შეგიძლიათ დაივიწყოთ ეს ამბავი, რადგან ალკოჰოლი არის უბრალოდ საწამლავი და მით უმეტეს ყოველდღიური მიღება არ მოგიტანთ არანაირ სიკეთეს თუ პირიქით არა.
რა თქმა უნდა, შეგიძლიათ დალიოთ ღვინო გარკვეულ პერიოდში ერთხელ და ეს არ არის პრობლემა, თუმცა უნდა იცოდეთ ის ეფექტები, რაც მოსდევს ღვინის დალევას და ასევე ის, რომ ღვინო არათუ სასარგებლო არ არის, არამედ დიდი დატვირთვაა თქვენი ორგანიზმისთვის და თქვენ ორგანიზმს დასჭირდება საკმაო ძალისხმევა ალკოჰოლთან გასამკლავებლად.
დღეისათვის სულ ეს იყო, თუ გაქვთ კითხვები, დაწერეთ კომენტარებში და შევხვდებით მომავალ ვიდეოში.
